"
Cu siam ?
Presentacien de l’associacien
Tot çò que concernís l’estructura associativa...
L’Engambi
La bibliotèca
Besiers 2K7 - Una capitada mai a qunt prètz ?
Auteurs : ostau
Page mise en ligne le : 19 mars 2007
Actualitat de l’ostau de març de 2007
De retorn dau passa-carriera de Besiers. Un passa-carriera qu’aurà capitat per recampar 20000 personas. Pasmens, demòran de cavas de dire...Una programacien musicala dau ser bessai tròp "lengadocentrista", qu’es pas per radobar lei bònei relaciens qu’avèm a l’ora d’ara emé nòstreis amics provençalistes. Per una manifestacien de l’unitat d’Occitània, seriá-ti pas estat mièlhs de far venir de gropes de totei lei regiens d’Occitania. Aquò dich, s’apren pas a la qualitat efectiva dei gropes que jueguèron, segur. Una cava de tornar veire per lo passa-carriera que vendrà. Parlarai puei de çò que foguèt lo mai grèu : la preséncia d’un quiengenau de neo-fascistes que s’agropèron dns la tòca d’infiltrar lo passa-carriera. Avián bèla va saupre lei organiseires, prenguèron pas lei mesuras que s’impauvèron, valent-a-dire forabandir quatecant aquelei rompa-bassas dau recampament. Tot aquò sota la pretexta de pas faire d’ersas !. Acabèt que tres personas anèron passar la fin de la jornada a l’espitau, que foguèron satonats. Tot lo monde va ben a l’ora qu’escrivi aquelei regas. Empacha pas pasmens quaurem ara de gròssei resèrvas per tornar manifestar ensems, se ren es pas fach per assegurar la seguretat dei manifestaires...Aquò estent dich, gramaciam totei lei gents que prenguèron la pena de si desplaçar, conoissut vò non. Un còp de mai, avèm representat coma faliá emé nòstra veisien d’Occitània. Òsca per lei particepaires !
Per clavar, acabarai sus lo Carnavàs de la Plana, que capitèt aquesto còp d’enrabiar una paura jornalista de la Provence. Un article messorguier e vindicatiu (per tornar prene sei pròpias expressiens...) que rampèla leis autoritats de nos mandar la policia, lei pompiers, e mai l’armada per lo carnavàs que vendrà. Aquò que si ven apondre a l’espetaclós article sus l’infiltracien occitana en Provença, doei setmanas de temps aperavans. De respònsas s’organisan per aquelei doei estraças redigits, v’esperam, per de paureis inocentas. Vos tendràn assabentats dau debanar de l’istòria...
